قصيدة باللهجة المحلية عن "سكيكدة" هدية لمنار

**** *رُوسِيكادا* ****
**** عَرُوسُ البَحْر ****

بابُور وبحر فوقُه غيومْ **** وحُوته عَذْرا في شَطُّه تعُومْ
قالوا عليها جيرانْها **** هذي عروسة بلادنا اليومْ
بصمَة لَحباب في قفطانْها **** جَلْوَه (1) بفَتْلَه (2) ومَجْبُوذ (3) مختومْ
موشْمَه بطيبة خِلاّنْها (4) **** وضيفها في رحابها مخدومْ
أهلي وناسي في حنانْها **** والله يتغمد المرحومْ

" " " " "

لَفراح تحلى في أيامْها **** "بْكُرنيش" في حزامها مبرومْ
زغاريتْ لَمواج في سلامْها **** وريحة أنفاسها (5) في لخشومْ
وفيها "السَّلام" (6) عَرْش مقامْها **** بُرجُه يسامي "ربعه" نجومْ
وبحرها ساجد قدامْها **** وفي احْضان "سطورَه" ديما يهومْ

" " " " "

سيرة لَجيالْ سلسالْها **** و"خيام الفن"(7) راويها يرومْ
تاجها الإيمان وخيالْها **** خلى "السردوك" (8) عليها مكتومْ
"لَفراز" (9) خانَه في جبالْها **** وعطر "السردينه" فيها يحومْ
"اقْصر بن قانه" خَلخالْها **** وتاريخ طويل معاها يدومْ

" " " " "

شمس "مْسِيْوَنْ" (10) حنّاتْها **** وتخجل في حَضرة لَغيومْ
ومن "غار سطورَه" هوّاتْها **** نسمة الليل كِهْجَرْها النومْ
شهْلا بقمحات "رملاتْها" **** ونُوّارها "التينه" و"لَكرومْ"
تسْحر بمناقش (11) "نخلاتْها" **** واللي عشقْها عن غيرها يصومْ

" " " " "

هذي "سكيكدة" يا محلاها **** "روسيكادا" سمّاتْها الرومْ

" " " " "

بابُور وبحر فوقُه غيومْ **** وحُوته عذرا في شطُّه تعومْ
هذي سكيكدة يامحلاها **** "روسيكادا" عروستنا اليومْ

" " " " "
(12)
سلّمْ عليها وابدَأ من "البُورْ" - "طريقْ ليزاليي" و"الفُوبُورْ"

سلّمْ لي علَى "بنْ حُوريّه" - "ليزوليفْيي" و"القُبيّه"

"بالُو" و"الـ 700 " و"السِيسَالْ" - و"الـ 500 " دايْما في البَالْ.

وفي "لاسيَا" ريحَة لَجدَادْ - والله يَرحَم سَهْرَاتْ "الوَادْ"

حُبي الأول فيها بادِي - مع يمّى وبابا يا اسيادِي.

"بوالكروَه" "الماتْش" و"الزرامْنَا" - وربي يَرحَم أهْل "زفزافْنَا"

"كامِي" "الـ 20 أوتْ" و"مرج الديبْ" - والله يرحم "سيد علي الديبْ".

سلامي عا "الكُور" "حومَة الطليانْ" - "طلعَة الحبْس": دروج وبيبانْ

"السْويقه" "بلاغْ" "سبع بيارْ" - "بويعلى" "بني مالك" "باطوارْ"

وجبَل "بُوعَبّازْ" عَسّاسْهَا - يستنّى الغايَبْ منْ نَاسْهَا.

بابُور وبحرْ فوقُه غيُومْ - وحُوتَه عذْرا في شَطُّه تعُومْ

هذي "سكيكدة" يامَحْلاها - "روسيكادا" عروستْنَا اليُومْ

بقلم: عبد الفتاح بوعكاز

***

(1) الجَلْوَه: فستان القطيفة المحروج بخيط الذهب.
(2) الفَتْلَه: خيط الحَرْج السميك.
(3) المَجْبُوذ: خيط الحَرْج الرفيع.
(4) الخِلاّن: جمع خليل.
(5) رائحة ملح البحر.
(6) فندق السلام.
(7) خيام الفن: المسرح الروماني والمسرح البلدي.
(8) كنيسة السردوك. والإيمان هنا تاجٌ يرصع هامتها وملازمٌ لها كالخيال.
(9) فاكهة الفرولة.
(10) جبل مْسِيْوَن. ومن جهته تغيب الشمس فتصنع لون الحناء في السماء وقت الغروب.
(11) لَمْناقش:"ق=g" حَلَق الأذن (لَفْلايَك)، وهو التمر المتدلي من النخل

(12) : كل الأبيات بعدها تصف أسماء لمناطق و أحياء داخل بلدية سكيكدة
و بالنسبة للمناطق المسماة بتواريخ أو أرقام فهي تنطق باللغة الفرنسية

قصيدة باللهجة المحلية عن "سكيكدة" هدية لمنار 53

قصيدة باللهجة المحلية عن "سكيكدة" هدية لمنار 53

شكــــــــــــــــــــــــرا لك على القصيــــــــــــــــــــــدة

وشكرا لك انت على المرور ميمي

شكرااااااااااااا لك رووحي على القصيدة الرائعة ل

عبد الفتاح بوعكاز

هدية ولا اروووووووووووووووووووع

دمت رائعة ومميزة

شكرا لك على هته القصيدة
بارك الله فيك